ترکی کے صدر رجب طیب اردو غان نے اسرائیل کے خلاف سخت رخ اختیار کر رکھا ہے۔ طیب اردو غان نے کہا ہیکہ اگر پوری دنیا خاموش بھی ہو جائے تب بھی ترکی اپنی آواز اٹھاتا رہےگا۔ ترکی کے میڈیا ذرائع کے مطابق اپنی پارٹی کے ارکان سے خطاب کرتے ہوئے اردوغان نے کہا کہ بیت المقدس مسلمانوں کے ساتھ ساتھ عسائیوں اور یہودیوں کے لئے مقدس مقام ہے جہاں اسرائیل نامی دہشت گرد ملک نے غیر انسانی حرکتوں کی حدیں پار کر دی ہیں۔ اسرائیلی حملے کے سلسلے میں میں نے کئی عالمی لیڈروں سے بات کی ہے اور سب نے میرے موقف کی تائید کی ہے۔ اردو غان نے کہا کہ اگر فلسطین میں اسرائیلی ظلم کے خلاف پوری دنیا بھی خاموش ہو جائے تب بھی ہم اسکے ظلم کے خلاف آواز اٹھاتے رہیں گے۔
ترکی میڈیا کے مطابق اردو غان نے کہا کہ ہم نے جس طرح شامی سرحد کے نزدیک دہشت گردی کا راستہ روکا اسی طرح مسجد اقصیٰ کی جانب بڑھتے ہوئے ہاتھوں کو بھی توڑ دیں گے۔ اردو غان نے کہا کہ اسرائیل کے مظالم کے خلاف آواز اٹھانا ہر حساس شخص کا فرض ہے۔ اردو غان نے عالمی برادری سے اسرائیل کے خلاف متحد ہونے کی اپیل کی ہے۔
