7 نومبر 2026 کو تہران میں ایک پریس کانفرنس کے دوران پاسدارانِ انقلاب کے ترجمان بریگیڈیئر جنرل حسین محبی نے ایک ایسی بات کہی جس کی گونج نے ایران کے دشمنوں پر لرزہ طاری کردیا۔ بریگیڈیئر جنرل حسین محبی سے بیلسٹک میزائلوں کی رینج پر عائد 2000 کلومیٹر کی خود ساختہ پابندی کے بارے میں سوال کیا گیا تو انہوں نے مختصر جواب دیا کہ یہ پابندی ہمارے لیے ختم کر دی گئی ہے۔ انہوں نے مزید کہا کہ ایران اپنی صلاحیتوں کو بیانات کے بجائے عملی طور پر دکھائے گا۔ یہ اعلان ایران کے سپریم لیڈر سید مجتبیٰ خامنہ ای کی اس ہدایت کے چند دن بعد سامنے آیا جس میں انہوں نے امریکہ یا اسرائیل کی جانب سے کسی بھی نوعیت اور سطح کے خطرے کا جواب جغرافیائی حدود کی پروا کئے بغیر دینے کی بات کی تھی۔
اس اعلان کی اہمیت سمجھنے کے لیے اس کا پس منظر دیکھنا ضروری ہے۔ 2000 کلومیٹر کی یہ حد ایرانی انقلاب کے بعد کے دور میں آیت اللہ علی خامنہ ای نے مقرر کی تھی، اور پاسدارانِ انقلاب کی بعض قیادتوں نے برسوں پہلے یہ دلیل دی تھی کہ اتنی رینج میں خطے کے بیشتر امریکی اڈے اور اسرائیل پہلے ہی آ جاتے ہیں، اس لیے اسے بڑھانے کی ضرورت نہیں۔ رپورٹوں کے مطابق ایران کے اندر سے 4000 سے 5000 کلومیٹر مار کرنے والے ہتھیاروں کا دباؤ موجود تھا، مگر علی خامنہ ای نے درستگی کو ترجیح دیتے ہوئے اس حد کو برقرار رکھا۔ فروری میں امریکہ اور اسرائیل کے ابتدائی حملوں کے بعد قیادت مجتبیٰ خامنہ ای کے ہاتھ میں آئی، اور اب انہوں نے وہ پالیسی بدل دی جو ان کے والد نے برسوں قائم رکھی تھی۔ اس لحاظ سے یہ تبدیلی محض ایک فوجی اعلان نہیں بلکہ ایرانی سوچ میں ایک بڑی تبدیلی کی علامت ہے۔
اس پابندی کے ہٹنے کا نظری مطلب یہ ہے کہ پہلے جو دائرہ عرب جزیرہ نما، مشرقِ وسطیٰ کے بڑے حصے، مصر کے بیشتر علاقوں اور یونان، بلغاریہ اور رومانیہ جیسے جنوب مشرقی یورپی ملکوں تک پہنچتا تھا، وہ اب مزید پھیل سکتا ہے۔ اس سے امریکہ کے دور دراز کے اڈوں اور یورپ کے ان ٹھکانوں پر توجہ بڑھ گئی ہے جو امریکی کارروائیوں کی معاونت کرتے ہیں۔ ایرانی بیانیے کے مطابق دنیا کا کوئی بھی ایسا مقام جہاں سے ایران کی قومی سلامتی کو سنگین خطرہ لاحق ہو، جائز ہدف بن سکتا ہے۔
یہاں ایک دلچسپ اور اہم نکتہ یہ ہے کہ ایران کے حامی تجزیہ کار اور بعض مبصرین یہ دلیل دیتے ہیں کہ یہ اعلان دراصل ایک موجودہ حقیقت کی رسمی تصدیق ہے۔ ان کا کہنا ہے کہ خرمشہر میزائل کی رینج تقریباً 3000 کلومیٹر بتائی جاتی ہے، اور مارچ 2026 میں بحرِ ہند میں واقع امریکی اڈے ڈیگو گارشیا کی طرف دو میزائل داغے جانے کی خبریں آئیں، جو ایرانی سرزمین سے تقریباً 4000 کلومیٹر کے فاصلے پر ہے۔ اگر یہ باتیں درست ہیں تو اس کا مطلب یہ نکلتا ہے کہ ایران کے پاس شاید ایسے میزائل پہلے سے موجود ہیں جن کی اصل رینج اس اندازے سے زیادہ ہے جو اب تک عام طور پر لگایا جاتا رہا۔ اسی لیے مبصرین کہتے ہیں کہ پابندی کا باضابطہ خاتمہ ایک نئی صلاحیت کے اعلان سے زیادہ اس بات کا اعلان ہے کہ ایران اب اسے چھپانا نہیں چاہتا۔ اس تناظر میں زیرِ زمین میزائل شہروں کا ذکر بھی آتا ہے۔ پاسدارانِ انقلاب کا دعویٰ ہے کہ اس نے ایسے زیرِ زمین مراکز تعمیر کیے ہیں جہاں بمباری کے دوران بھی میزائلوں کی تیاری اور ذخیرہ جاری رہ سکتا ہے۔ ایران کے حامیوں کے نزدیک یہ اس بات کا ثبوت ہے کہ فروری کے بعد کے حملوں کے باوجود ایران کی میزائل صلاحیت ختم نہیں ہوئی بلکہ اس نے خود کو ان حملوں کے مطابق ڈھال لیا ہے۔ ان کے خیال میں فضائی حملے سطحی ڈھانچوں کو نقصان پہنچا سکتے ہیں لیکن پہاڑوں کی گہرائی میں بنے ہوئے مراکز کو ختم کرنا آسان نہیں، اور یہی ایران کی اصل دفاعی حکمتِ عملی ہے۔ اس نقطۂ نظر کے مطابق ہر حملے نے ایران کو اپنی صلاحیت مزید چھپانے، مضبوط بنانے اور بڑھانے کا موقع دیا
بہت سے مغربی اور اسرائیلی تجزیہ کار اس اعلان کو بڑی حد تک سیاسی پیغام اور دباؤ کی حکمتِ عملی قرار دیتے ہیں، جو امریکی سینٹرل کمانڈ کی نئی ٹاسک فورس کے اعلان کے فوراً بعد سامنے آیا۔ ان کے نزدیک مقصد ٹھوس صلاحیت دکھانے سے زیادہ مخالفین کو متنبہ کرنا ہے۔
مجموعی طور پر جو بات تسلیم کی جانی چاہیے وہ یہ ہے کہ یہ اعلان ایک بڑی اور ٹھوس تبدیلی ہے جس سے ایران کی عسکری حکمتِ عملی کا رخ واضح ہوتا ہے۔ ایران یہ پیغام دے رہا ہے کہ وہ جنگ کو محض اپنی سرحدوں کے آس پاس محدود رکھنے پر آمادہ نہیں۔ وہ ہر اس دور دراز موجود فوجی اڈے کو نشانہ بنانے کو تیار ہے جہاں سے اسکے خلاف کاروائی کی جائےگی۔
