ایران کی وزارت خارجہ نے پہلی بار یہ تصدیق کی ہیکہ خطے اور دونوں ملکوں کے درمیان کشیدگی کم کرنے کی کوشش کے تحت سعودی عرب کے ساتھ گفتگو ہوئی ہے۔ ایران کی وزات خارجہ کے ترجمان سعید خطیب زادے نےپیرکو بتایا کہ ایران نے ہمیشہ اپنے ہمسایہ ملکوں کے ساتھ گفتگو کا خیر مقدم کیا ہے۔ گفتگو کی تفصیل بتانے سے پرہیز کرتے ہوئے خطیب زادے نے کہا کہ دیکھنا ہیکہ اس گفتگو کا کیا نتیجہ ہوتا ہے اور اسکے نتائج سے ہی گفتگو کی کامیابی کا اندازہ ہوگا۔ سعودی عرب کی وزارت خارجہ کے حکام ایک روز پہلے ہی دونوں ملکوں کے درمیان گفتگو کی تصدیق کرچکے ہیں۔ انکا بھی کہنا تھا کہ نتائج کے بارے میں کچھ کہنا قبل از وقت ہوگا۔
کسی بھی فریق کی جانب سے گفتگو کی تفصیلات نہیں بتائی گئی ہیں۔ لیکن خبروں کے مطابق دوطرفہ رشتوں کے ساتھ ساتھ دونوں ملکوں کے حکام نے یمن کی تازہ صورتحال اور عالمی طاقتوں اور ایران کے ایٹمی معاہدے پر تبادلہ خیال کیا ۔ اسرائیل کی طرح سعودی عرب بھی اس ایٹمی معاہدے کا مخالف رہا ہے۔
